გერმანული ავტომწარმოებელი კომპანია ISDERA გაკოტრდა, ანუ 1980-იანი წლებში სახელგანთქმული ბრენდის მიმზიდველ, მაგრამ უცნაურ სპორტქარებს გზებზე, სავარაუდოდ, აღარასდროს ვიხილავთ. გერმანიის ქალაქ ლეონბერგში 1982 წელს დაფუძნებული ეს კომპანია ძვირად ღირებულ სპორტულ ავტომობილებს აწარმოებდა, რომელთაც ექსკლუზიურობა და ტექნიკური ექსტრავაგანტურობა გამოარჩევდა. ISDERA-ს თითოეული ავტომობილი სპეციალური შეკვეთით მზადდებოდა, ხოლო შეკვეთას კომპანია მხოლოდ იმ ადამიანისგან იღებდა, რომელიც კომპანიის დამფუძნებელს, ებერჰარდ შულცს თავად იცნობდა. შეზღუდული წარმოების დამსახურებით, ISDERA-ს თითოეული ავტომობილი დღეს დიდ საკოლექციო ღირებულებას ატარებს.საავტომობილო ბრენდის სახელი, შესაძლოა, უცნაურად ჟღერდეს, მაგრამ ის “სტილის, დიზაინის და რბოლის საინჟინრო ოფისის” შემოკლებული ვარიანტია. თავად ეს მიდგომა კომპანიის დამფუძნებლის, ებერჰარდ შულცის დნმ-ში იყო გადმოცემული, რადგან საკუთარი კომპანიის დაფუძნებამდე ის Porsche-ში მუშაობდა. გერმანული ავტომობილების სიყვარული შულცს სამომავლოდაც გაჰყვა, რადგან ISDERA-ს ავტომობილები გერმანული საავტომობილო ინჟინერიის საუკეთესო პრაქტიკას ეფუძნებოდა, ხოლო თავად ავტომობილები, ხშირად, არსებული მანქანების ნაწილებს იყენებდა.აი, სწორედ ამ მიდგომით შეიქმნა ISDERA Imperator 108i — საავტომობილო ბრენდის ყველაზე ცნობილი მოდელი, რომელიც 1984-1993 წლებში იწარმოებოდა. ეს ავტომობილი Mercedes-Benz CW311-ის კონცეპტუალურ ავტომობილს ეფუძნებოდა, რომლის შექმნაში მონაწილეობა თავად ებერჰარდ შულცმა მიიღო. Imperator-ში Mercedes-Benz-ის V8-ის ტიპის ძრავი იდო, რომელიც 400-მდე ცხენის ძალას გამოიმუშავებდა და საუკეთესო ვარიანტში 283 კმ/სთ-მდე ჩქარდებოდა. თავად ავტომობილი მეტად ფუტურისტული იყო, რაც ვერტიკალური კარებით, ამომხტომი მაშუქებით და პერისკოპული უკანა ხედვის კამერით დასტურდებოდა. ჯამში, ISDERA-მ Imperator-ის 30 ეგზემპლარი გაყიდა.Imperator-ის არც თუ ისე დიდმა კომერციულმა წარმატებამ ებერჰარდ შულცის კომპანია არათუ შეაშინა, არამედ ახალი, უფრო ამბიციური მიზნებისკენ გაუხსნა გზა. აი, ასე 1993 წელს მსოფლიომ ISDERA Commendatore 112i იხილა, რომელიც არათუ ჩვეულებრივ ავტომობილად, არამედ Bugatti-ის და Ferrari-ის კონკურენტად შეიქმნა. თავად ავტომობილის სახელწოდება — Commendatore — ლეგენდარულ ენცო ფერარის გვახსენებს. Imperator-ში Mercedes-Benz-ის 6-ლიტრიანი V12-ტიპის ძრავი იდო, რომელიც 408 ცხენის ძალას გამოიმუშავებდა და 342 კმ/სთ-მდე ჩქარდებოდა. ავტომობილი აღჭურვილი იყო აქტიური დაკიდების სისტემით, DRS-იანი შასით და ავტომატური უკანა სპოილერით. აგრეთვე შთამბეჭდავი იყო ავტომობილის დიზაინი, რომელიც Le Mans-ის 24-საათიანი რბოლით იყო შთაგონებული, მაგრამ ფინანსური პრობლემების გამო, ავტომობილს ლე-მანის ასფალტზე არასდროს გაუვლია.Commendatore-ს ფინანსური ჩავარდნის შემდეგ, ებერჰარდ შულცის კომპანიას სპორტქარები აღარ შეუქმნია, მაგრამ ავტომობილი ISDERA-მ მაინც შექმნა. აი, ასე იხილა კაცობრიობამ 2006 წელს გამოშვებული ISDERA Autobahnkurier-ი, რომელიც გერმანელმა ინჟინრებმა 1930-იანი წლების გრანდ-ტურერის სხეულში მოათავსეს. ავტომობილში Mercedes-ის V8-ტიპის 10-ლიტრიანი ძრავი იდო, რომელიც 600 ცხენის ძალას გამოიმუშავებდა, რითაც ISDERA-მ ამ კლასის ავტომობილებში ახალი სიტყვა თქვა.გერმანული ISDERA არასდროს ყოფილა ბრენდი, რომელიც ბევრ ავტომობილს შექმნიდა. წარმოუდგენელ ექსკლუზიურობაზე დაფუძნებული ეს კომპანია იდეებს უფრო ქმნიდა, ვიდრე ავტომობილებს, რამაც, საბოლოო ჯამში, კომერციული სარგებელი ვერ მოუტანა და ავტომწარმოებელი გაკოტრებამდე მიიყვანა. თუმცა რაც უნდა დიდი იყოს ISDERA-ს ფინანსური გასაჭირი, ებერჰარდ შულცის მიერ 80-იან წლებში შექმნილმა ბრენდმა ავტოენთუზიასტების გული მოიგო.

2019 წლის ჟენევის ავტოშოუზე შვეიცარიაში დაფუძნებულმა Piëch Automotive-მა პირველი ავტომობილი, Mark Zero წარმოადგინა. შვეიცარიული კომპანიის პირველი მერცხალი სამი ელექტროძრავის მქონე სპორტული ელექტრომობილი იყო, რომელიც 611 ცხენის ძალას ავითარებდა და 80%-მდე სულ რაღაც ხუთ წუთში იმუხტებოდა - სულ მცირე, ასე ამბობდნენ ავტომობილის შემქმნელები. ეს ორადგილიანი სპორტული კუპე $150,000 ღირდა და მისი წარმოება 2024 წელს უნდა დაწყებულიყო, მაგრამ Piëch Automotive-ის ამ პროტოტიპმა ინვესტორების ყურადღება ვერ მოიზიდა, ანუ პროექტი ჩავარდა და მასთან ერთად მოკვდა ტონი პიეხის ოცნება ოთხადგილიანი სედანის და SUV-ის შექმნის თაობაზე, რომლებიც შვეიცარიულ კომპანიას Mark Zero-ს შემდეგ უნდა გამოეშვა.საავტომობილო ინდუსტრიაში ჩახედული ადამიანისთვის Piëch Automotive-ი, შესაძლოა, ნაცნობად ჟღერდეს, რადგან ის საავტომობილო ინდუსტრიაში ერთ-ერთი ყველაზე გავლენიანი ადამიანის, ფერდინანდ პიეხის სახელს ჰგავს. ეს ადამიანი, რომელმაც გერმანული Volkswagen-ი ჭეშმარიტ საავტომობილო გიგანტად აქცია და ჯგუფის პორტფელში ბრიტანული Bentley, ფრანგული Bugatti და იტალიური Lamborghini შეიყვანა, ერთ-ერთი საუკეთესო მენეჯერია, რომელსაც კომპანიის მართვის სადავეები აუღია. ამასთან, ფერდინანდ პიეხი ლეგენდარული ფერდინანდ პორშეს შვილიშვილი იყო და გავლენა, რომელიც მან გლობალურ საავტომობილო ინდუსტრიაზე მოახდინა, არანაკლებ მნიშვნელოვანია, ვიდრე ის ავტომობილები, რომლებიც ფერდინანდ პორშემ და მისმა ვაჟმა, ფერი პორშემ წლების განმავლობაში შექმნეს.თუმცა მნიშვნელოვანი დეტალი ისაა, რომ შვეიცარიული Piëch Automotive-ის სახელი უკავშირდება არა ფერდინანდ პიეხს, არამედ მის ვაჟს, ტონი პიეხს, რომელმაც ეს კომპანია 2017 წელს დააფუძნა. ფერდინანდ პიეხი არა თუ არანაირ კავშირში არ იყო ამ პროექტთან, ის მისი მთავარი კრიტიკოსიც იყო და საჯაროდაც თქვა, რომ მისი ერთ-ერთი ვაჟის წამოწყებაში არ მონაწილეობს. გავლენიანი მამისგან უარის მიღების და ჟენევის ავტოშოუს შემდეგ განცდილი კომერციული მარცხის მიუხედავად, ტონი პიეხმა კომპანიის აღორძინება კიდევ ერთხელ გადაწყვიტა, რისთვისაც Mercedes-AMG-ისა და Aston Martin-ის ყოფილ ხელმძღვანელთან, ტობაიას მოერსთან დაპარტნიორდა.ავტომობილი, რომელიც პიეხისა და მოერსის კოლაბორაციით შეიქმნა, ჯერაც თიხის მოდელის სტადიაზე არის გაჩერებული, ანუ მარტივად რომ ვთქვათ, ის - კონცეპტუალურია. Piëch GT 2.0-ის სახელით ცნობილი კონცეპტუალური ავტომობილი - ორი ელექტრული ძრავით აღჭურვილი ორადგილიანი კუპეა, რომელიც 1000 ცხენის ძალას გამოიმუშავებს. მართალია, პირველი პროტოტიპის გამოშვებას კომპანია 2025 წელს გეგმავს, მაგრამ თუ ყველაფერი ისე დალაგდა, როგორც Piëch Automotive-ის დამფუძნებლებს სურთ, ეს $200,000-იანი ავტომობილი ბაზარზე 2028 წელს გამოჩნდება. როგორც ჩანს, Piëch GT 2.0-ის მაქსიმალური სიჩქარე 300 კმ/სთ-ში იქნება, ხოლო 100 კმ/სთ-მდე ის 2.6 წამში აჩქარდება და ელემენტების ერთი დამუხტვით 500 კილომეტრს გაივლის.Piëch Automotive-ის უახლესი კონცეპტუალური ავტომობილის ტექნიკური მონაცემები საინტერესო და გამოსარჩევია, მაგრამ Piëch GT 2.0-ის შედეგებს შორის არაფერი არის ისეთი, რასაც მისი პირდაპირი კონკურენტი - Porsche Taycan Turbo ვერ დადებს. მნიშვნელოვანია ისიც, რომ გერმანული ავტომობილი დაახლოებით იმავე საფასო კატეგორიაში ხვდება, ანუ ადამიანი, რომელიც Piëch GT 2.0-ის ყიდვას გადაწყვეტს, დილემის წინაშე აღმოჩნდება, რადგან არჩევანის გაკეთება ობიექტურად ერთ-ერთ საუკეთესო ელექტრომობილს და შვეიცარიული სტარტაპის მიერ შექმნილ პირველ ავტომობილს შორის მოუწევს. ამასთან, ცხადია, Piëch GT 2.0-მა მძღოლს ისეთივე სიამოვნება უნდა მიანიჭოს, როგორც მართვისას, ასევე აბსტრაქტულად, რაც რთულია, როცა Porsche-ს ეჯიბრები. თუმცა არც ის ფაქტი არის დასავიწყებელი, რომ ფერდინანდ პიეხი მისი ვაჟის ამ წამოწყებით დიდად არ ამაყობდა, ხოლო ვის-ვის და დიდ ფერდინანდს ავტომობილებში ჭკუა კი მოეკითხება.ტონი პიეხის კომპანიის მიერ შექმნილი ბოლო ავტომობილის დიზაინი რადიკალურად განსხვავდება იმ დიზაინისგან, რომელიც Piëch Automotive-მა ხუთი წლის წინ წარმოადგინა და ობიექტურები თუ ვიქნებით, ახალი ავტომობილი უკეთესად გამოიყურება. პირველი, რაც თვალში გვხვდება GT-ტიპის ავტომობილისთვის დამახასიათებელი მომრგვალებული დიზაინია, რომელიც Aston Martin-ის ფორმებს მოგვაგონებს. თუმცა, არც დეტალები უნდა დავივიწყოთ, მათ შორის თანამედროვე წინა და უკანა მაშუქები და შედარებით მასიური, მაგრამ ელეგანტური თვლები. როგორც ტობაიას მოერსი ამბობს, თითოეული Piëch GT 2.0 სპეციალური შეკვეთით დამზადდება, ანუ არც ერთი ავტომობილი არ იქნება მეორეს მსგავსი, რადგან პერსონიფიკაცია შესაძლებელი იქნება არამხოლოდ ფიზიკური დეტალებისთვის, არამედ ავტომობილის ხმებისთვის და მართვის რეჟიმებისთვისაც კი.აუცილებლად უნდა ვახსენოთ კომპანია, რომელიც Piëch Automotive-ის ავტომობილებს ააწყობს - ეს კანადური Multimatic-ია, რომელსაც ტობაიას მეიერსთან ამ დრომდეც უმუშავია, თანაც არა უბრალო ავტომობილებზე, არამედ AMG One-ზე და Aston Martin Valkyrie-ზე, რაც საკმაოდ შთამბეჭდავი პორტფელია. როგორც ტობაიას მოერსი ამბობს, Piëch GT 2.0 ულტრალიმიტირებული წარმოების ავტომობილი იქნება - 2028-2029 წლებში, კომპანია 2,000 ერთეულის გამოშვებას გეგმავს. მოგვიანებით, Piëch Automotive-ი ოთხკარიანი სედანისა და Ferrari Purosangue-ს მსგავსი სუპერ-SUV-ის გამოშვებას გეგმავს, მაგრამ ეს პროექტი დაახლოებით ათწლიან პერიოდს უყურებს.ტონი პიეხის შეფასებით, კომპანია მალე ფინანსურად მოგებიანიც იქნება. ანტრეპრენიორის შეფასებით, 2029 წელს Piëch Automotive-ი ნულოვან მოგებას დააფიქსირებს, 2030 წლიდან კი - კომერციულად მოგებიანი კომპანია გახდება. ამ ეტაპზე, Piëch Automotive-ში 30 ადამიანი მუშაობს, ხოლო კომპანიას 70 ინვესტორი ჰყავს, რომელთა შორის არაბი ინვესტორები ჭარბობენ.

ევროკავშირი, რომელიც 27 ქვეყანაში მცხოვრებ 450 მილიონ ადამიანს აერთიანებს, პლანეტის ერთ-ერთი ყველაზე დიდი, დინამიკური და, რაც მთავარია, ერთ-ერთი მაღალშემოსავლიანი ბაზარია პლანეტაზე. ევროკავშირი ბევრი რამით არის განთქმული, მაგრამ განსაკუთრებით დიდი წვლილი ევროპულ სახელმწიფოებს საავტომობილო ინდუსტრიის განვითარებაში მიუძღვით. წამყვანი საავტომობილო ბრენდები, მათ შორის Porsche, Volkswagen, BMW, Mercedes-Benz, Ferrari და Lamborghini, სწორედ ევროპული კომპანიები არიან, რაც ევროპელების მხრიდან მანქანების სიყვარულს კიდევ უფრო ადასტურებს.თუმცა განსაკუთრებული სილამაზის და სიმძლავრის ავტომობილებთან ერთად, ევროპელებს განსაკუთრებით უყვართ მცირე ზომის ავტომობილები, რომელთა დახმარებით ძველი ევროპული ქალაქების ქუჩებში უპრობლემოდ გადაადგილდებიან. სწორედ ასეთ ავტომობილებს ქმნიან შედარებით ბიუჯეტური ევროპული ავტომწარმოებელი კომპანიები, მათ შორის Renault, Fiat, Peugeot და OPel, რაც ნაწილობრივ, ავტოწარმოების სუბსიდირებით აიხსნება. ასეთი ავტომობილები, როგორც წესი, კომპაქტურობით და ბიუჯეტურობით გამოირჩევიან. დღეს, იმ ყველაზე იაფიან ავტომობილებს გაგაცნობთ, რომლებიც ევროკავშირის ბაზარზე იყიდება.ყველაზე იაფიანი ავტომობილი, რომელიც ევროკავშირის ბაზარზე იყიდება, ფრანგულმა Citroën-მა შექმნა და სულ რაღაც 8,000 ევრო ღირს. Citroën Ami კომპაქტური ელექტრო კვადროციკლია, რომელიც ქალაქის შიდა გადაადგილებისთვის შეიქმნა. ამ ავტომობილის მაქსიმალური სიჩქარე 45 კილომეტრია საათში, ხოლო ელემენტების სრული დამუხტვით ის 75 კილომეტრს გადის. Citroën Ami, რომლის დანახვა თბილისის ქუჩებშიც შეიძლება, მინიმალისტური დიზაინით გამოირჩევა და ძირითადად ახალგაზრდა, ახალბედა მძღოლებისთვისაა განკუთვნილი.ევროკავშირის ბაზრისთვის იაფიან ავტომობილებს რუმინული Dacia-ც ქმნის, რომელიც 1999 წელს ფრანგული Renault-ს შემადგენლობაში გადავიდა. Dacia, რომელიც 1966 წელს დაფუძნდა, რეალურად, სწორედ იაფიანი, მაგრამ შედარებით გამძლე ავტომობილებითაა ცნობილი, რომლებსაც მომხმარებლები სარფიან შეთავაზებად აფასებენ. ევროკავშირის ბაზარზე Dacia რამდენიმე მოდელით არის წარმოდგენილი, რომელთა შორის ყველაზე იაფი Dacia Sandero-ა, რომლის ფასი 13,795 ევროდან იწყება.ევროკავშირის ბაზარზე გაყიდული იაფიანი ავტომობილების ჩამონათვალში, ასევე, მოხვდა იტალიური Fiat, რომელიც მცირე ზომის საქალაქო ავტომობილების შექმნითაა ცნობილი. Fiat-ის რიგებიდან ამ რეიტინგში შედარებით მცირე ზომის საქალაქო ჰეჩბეკი, Fiat Panda მოხვდა, რომლის საწყისი ფასი 14,000 ევროა. ეს ავტომობილი კომპაქტური, მაგრამ ტევადია და თან მცირე ძრავებით იწარმოება, რაც საწვავის დაბალ წვას და შესაბამისად, ბიუჯეტურობას უზრუნველყოფს.ევროკავშირის ბაზრისთვის განკუთვნილი იაფიანი ავტომობილების ჩამონათვალში გერმანული ავტოწარმოების ლიდერი - Volkswagen მოხვდა. ამ რეიტინგში მცირე ზომის საქალაქო ავტომობილი Volkswagen up ლიდერობს, რომელსაც ევროპულ გზებზე 2011 წლიდან ვხვდებით. აპი მცირე ზომის საქალაქო ავტომობილია, რომელიც კომპაქტურობით და გერმანული ბრენდის ხარისხით და სანდოობით გამოირჩევა. ჰეჩბეკის ტიპის ეს ავტომობილი მცირე მოცულობის ძრავებითაა აღჭურვილი, ხოლო მისი საწყისი ფასი 14,500 ევროა.ამ რეიტინგში, სადაც სუბსიდირებული ევროპული ავტომობილები დომინირებენ, ასევე მოხვდა იაპონური Suzuki, რომელიც ევროკავშირში 15,500 ევროდ შეფასებულ Suzuki Swift ყიდის. Suzuki Swift, ისევე, როგორც ფაქტობრივად ყველა სხვა ბიუჯეტური ავტომობილი კომპაქტური საქალაქო ჰეჩბეკია, რომელიც სპორტული დიზაინით და მართვის მოქნილი სისტემით გამოირჩევა. Swift იაპონური ავტომობილია, რაც მომხმარებლის გონებაში გამძლეობაზე, სანდოობასა და დაბალ დანახარჯებზე მიუთითებს.

ამერიკული Tesla, რომელსაც რიგი ფაქტორების გამო ბოლო თვეებში ელექტრომობილების გაყიდვა ფაქტობრივად ყველა ბაზარზე უჭირს, შემოსავლის გაზრდის მიზნით სიახლეებს აანონსებს.ჩინელი მომხმარებლის გულის მოსაგებად ილონ მასკის კომპანია ქვეყანაში ორ ახალ მოდელს წარადგენს. პირველი — გაზრდილი გასავლელი მანძილის მქონე სედანი Model 3 Plus-ია, მეორე კი — უფრო გრძელი, სამრიგიანი Model YL. ცოტა ხნით ადრე, Tesla-მ ჩინეთში Model Y Juniper-ი წარადგინა, მაგრამ ამ იდეამ, როგორც ჩანს, არ იმუშავა.ახალი $50,000-იანი Tesla Model YL ჩინეთში შემოდგომაზე გამოჩნდება. ეს ავტომობილი ექვსადგილიანია და ჩვეულებრივ მოდელთან შედარებით ოდნავ გრძელი და მაღალია. ამასთან, ელექტომობილს განახლებული დიზაინის დისკები, სკამები და უკანა ნაწილი აქვს, სადაც ასევე ახალ სპოილერს ვხვდებით. მსგავს ავტომობილს Tesla ამერიკის შეერთებულ შტატებშიც ყიდის, მაგრამ იმ ავტომობილში სივრცე საკმაოდ ლიმიტირებული. Tesla Model YL-ში ორი ელექტრომოტორი აქვს, რომლებიც ჯამურად 456 ცხენის ძალას გამოიმუშავებენ.

აშშ-ის პრეზიდენტის, დონალდ ტრამპის მიერ ქვეყანაში ავტომობილების იმპორტზე დაწესებულმა 25%-იანმა ტარიფმა პირველადი შედეგები გამოიღო. 2025 წლის მეორე კვარტალში, General Motors-ის შემოსავალი 1.8%-ით შემცირდა და $47.1 მილიარდი შეადგინა, როცა წმინდა მოგებამ ერთბაშად 35%-იანი კლება აჩვენა.კომპანიის შეფასებით, ტარიფების დარტყმის ეკონომიკური ეფექტის მოცულობამ $1.1 მილიარდი შეადგინა.უახლეს შედეგებთან ერთად, საკმაოდ პესიმისტურად გამოიყურება კომპანიის პროგნოზი, რომლის თანახმად დასახულ შემოსავალს კომპანია წლის ჭრილში მაინც მიიღებს, მაგრამ წმინდა მოგება იმაზე მეტად შემცირდება, ვიდრე მეორე კვარტალში.General Motors-ი ამერიკული კომპანიაა, რომელიც ავტომობილებს მექსიკაში, კანადაში და სამხრეთ კორეაში აწარმოებს და თითოეული ამ ქვეყნისთვის ავტომობილებზე 25%-იანი ტარიფი მოქმედებს, რაც GM-ის ავტომობილებს აძვირებს.

აუქციონების სამყაროში საინტერესო და მნიშვნელოვანი გარიგება შედგა. ლეგენდარული ავტომრბოლელის, მიხაელ შუმახერის Ferrari-ის ბოლიდი, რომლითაც 2001 წელს გერმანელმა მსოფლიო ჩემპიონის ტიტული მეოთხედ, იტალიურ საჯინიბოსთან კი მეორედ მოიპოვა, მონაკოში გამართულ Sotheby’s-ის აუქციონზე $18.2 მილიონად გაიყიდა.აუქციონის ადგილად მონაკო ტყუილად არ შერჩეულა, რადგან გასულ უქმეებზე იქ F1-ის მონაკოს გრან-პრი გაიმართა, რომელიც, სხვათა შორის, შუმახერმა 2001 წელს სწორედ ამ ბოლიდით მოიგო.იტალიური საჯინიბოს ინჟინრების მიერ 2001 წელს შექმნილი ეს ბოლიდი V10-ტიპის 3-ლიტრიანი ძრავითაა აღჭურვილი, რომელიც 825 ცხენის ძალას გამოიმუშავებს. ამ ბოლიდით მიხაელ შუმახერმა 13-ჯერ დაიკავა ადგილი პოდიუმზე, ხოლო ათი რბოლა პირველ ადგილზე დაასრულა. თავად მრბოლელმა სეზონი 123 ქულით დაასრულა, ხოლო კონსტრუქტორთა ჩემპიონატში აგრეთვე Ferrari-მ გაიმარჯვა. იმ დროს, Ferrari-ის მეორე პილოტი ბრაზილიელი რუბენს ბარიკელო იყო, რომელსაც მიხაელ შუმახერის წარმატებაში დიდი წვლილი მიუძღვის.ლეგენდარული მაიკლ შუმახერის ეს ბოლიდი F1-ის ისტორიაში Ferrari-ის ყველაზე ძვირად გაყიდული ავტომობილი გახდა. ამ სიმბოლურ ტიტულს მანამდეც შუმახერი ფლობდა, როცა Ferrari-ის 2003 წლის ბოლიდი $13.2 მილიონად გაიყიდა, ჯერ კიდევ 2022 წელს. იმ ბოლიდით, მაიკლ შუმახერმა რიგით მეექვსე, ანუ ბოლოსწინა ტიტული მოიგო. უშუალოდ F1-ის ისტორიაში ყველაზე ძვირად ღირებული სარბოლო ავტომობილის ტიტული გერმანული Mercedes-ის W196 R-ისაა, რომლითაც კომპანიამ 1954 და 1955 წლების მსოფლიო ჩემპიონატები მოიგო. Mercedes-ის ეს ბოლიდი გასულ წელს $54 მილიონად გაიყიდა.ბევრის აზრით, მიხაელ შუმახერი F1-ის ისტორიაში ყველაზე მნიშვნელოვანი მრბოლელია, რის გამოც მისი სამახსოვრო ნივთები აუქციონზე საკმაოდ ძვირად იყიდება. 2001 წლის სეზონის Ferrari-ის ბოლიდი, მართალია, შუმახერის ნივთებს შორის ყველაზე ძვირია, მაგრამ დიდ ღირებულებას მისი სხვა ნივთებიც ატარებს. გასულ წელს, ჟენევაში გამართულ Christie’s-ის აუქციონზე F.P. Journe-ის მიერ სპეციალურად შუმახერისთვის შექმნილი მაჯის საათი, სახელწოდებით Vagabondage One, რომელიც მრბოლელს Ferrari-ის გენერალურმა დირექტორმა, ჟან ტოდმა აჩუქა $1.65 მილიონად გაიყიდა.