დიქტატორის ქონების დათვლა ერთ-ერთი ყველაზე რთული საქმეა, რომელიც ადამიანს შეიძლება დაევალოს, რადგან ავტორიტარული რეჟიმები, რომლებიც, ყველგან და ყოველთვის, ადამიანთა მცირე ჯგუფის მიერ დიდძალი მატერიალური სიმდიდრის დაგროვებაზე დგანან, ქონებას არაოფიციალურად ფლობენ, ხოლო აქტივებს სხვა ქვეყნებში, მათ შორის ოფშორულ ზომებში მალავენ. თავად ეს მიდგომა პრაგმატულია, რადგან დიქტატორული რეჟიმი, შესაძლოა, ნებისმიერ დროს დასრულდეს და ქონება, რომელიც სხვადასხვა ქვეყნის სხვადასხვა აქტივებში არის გადანაწილებული, უსაფრთხო და დივერსიფიცირებულია.ისტორიაში ასეთი რამ არაერთხელ მომხდარა და, სავარაუდოდ, მომავალშიც მოხდება. ბოლო ავტორიტარული რეჟიმი, რომელიც მსოფლიოში დაემხო, სირიას უკავშირდება, სადაც ოცდაოთხწლიანი დიქტატორული მმართველობის შემდეგ ბაშარ ალ-ასადის რეჟიმი დაემხო. ასადის პოლიტიკური წესრიგი გაააქტიურებულმა ოპოზიციამ შეარყია, რომელიც რამდენიმე კვირის წინ უეცრად გააქტიურდა და სირიის მთავარი ქალაქები აიღო, რამაც რეჟიმი დაასრულა, ხოლო მისი დიქტატორი მოკავშირე რუსეთში, პრეზიდენტ ვლადიმირ პუტინის კარზე გააქცია.კონკრეტულად რა ქონება მოიხვეჭა ბაშარ ალ-ასადმა და მისმა ოჯახმა სირიაზე ოცდაოთხწლიანი მმართველობის განმავლობაში დაზუსტებით სავარაუდოდ მხოლოდ დიქტატორმა და მისმა რამდენიმე ფინანსისტმა იციან, რადგან ასადის აქტივები გასაიდუმლოებულია. აშშ-ის სახელმწიფო დეპარტამენტის 2022 წლის დათვლებით, ბაშარ ალ-ასადის აქტივების ღირებულება ერთი მილიარდიდან თორმეტ მილიარდ დოლარამდე მერყეობს, მაგრამ კონკრეტული ჩამონათვალი, უცნობია.ნათელი არც ის არის, თუ ვინ განაგებს დიქტატორის ამ დიდძალ ქონებას, მაგრამ, როგორც ცნობილია, ბოლო წლებში, ბაშარ ალ-ასადის ნათესავებმა და სირიის მმართველთან დაკავშირებულმა პირებმა არაერთი ძვირად ღირებული უძრავი ქონება შეიძინეს, როგორც რუსეთში, ასევე ავსტრიაში და არაბთა გაერთიანებულ საამიროებში. როგორც ჩანს, ძვირად ღირებული ნივთების საყიდლად თანხა ასადის რეჟიმმა სახელმწიფო კომპანიებზე დაწესებული მონოპოლიით და სხვადასხვა შავი ბიზნესით მიიღო, ხოლო თავად შესყიდვები იმიტომ გახდა შესაძლებელი, რომ მსოფლიოში ბევრი ქვეყანა სანქციებს უბრალოდ არ აღასრულებს.ისე კი, ისტორიას ახსოვს შემთხვევა, როცა საფრანგეთის სასამართლომ ბაშარ ალ-ასადის ბიძის, რიფაატ ასადის საკუთრებაში არსებული $95 მილიონი გაყინა. როგორც სასამართლოში 2019 წელს ფიქრობდნენ, ეს ფული უფროსმა ასადმა სირიის ქონების მისაკუთრებით და სახელმწიფო ფულის გათეთრებით მიიღო, რაც არასამართლიანია და, შესაბამისად, სანქციებს უნდა დაექვემდებაროს. თუმცა ის, რაც შესაძლებელია საფრანგეთში, ფაქტობრივად შეუძლებელია არაბთა გაერთიანებულ საამიროებში და რუსეთში, რომელიც თავადაც ავტორიტარული სახელმწიფოა.

საფრანგეთის ერთ-ერთმა უდიდესმა ბანკმა, Société Générale-მ დოლარის სტაბილური კრიპტოვალუტა გამოუშვა. ციფრული აქტივის სახელწოდებაა CoinVertible და ის USDCV-ის ტიკერით იქნება ცნობილი.ახალი ვალუტა Ethereum-ის და Solana-ს ბლოკჩეინებზე დაილისტება, ხოლო თავად თანხა, რომელსაც აქტივი ეფუძნება, მსხვილი ამერიკული ბანკი, Bank of New York Mellon-ში იქნება შენახული.Société Générale კრიპტოინდუსტრიაში ამ დრომდეც ოპერირებდა, მათ შორის სტეიბლკოინების მიმართულებით, როცა ინსტიტუციური კლიენტებისთვის 2023 წელს ევროს სტეიბლკოინი — EURCV გამოუშვა. ამრიგად, ამერიკულ დოლარს მიბმული სტაბილური კრიპტოვალუტის გამოშვება მოულოდნელი ნამდვილად არ არის, მით უფრო რომ აშშ-ში სტეიბლკოინების გამომშვები კომპანიებისთვის რბილი საკანონმდებლო ჩარჩოს შექმნა იგეგმება.როგორც ფრანგულ ბანკში ამბობენ, სტეიბლკოინის გამოშვებით, Société Générale-ს კლიენტები ოპერაციებს უფრო მარტივად შეასრულებენ, მათ შორის ფიატ ვალუტას და ციფრულ ვალუტას შორის გადარიცხვებს 24/7-ზე შეასრულებენ, რაც ამერიკულ დოლარში და ევროში ტრანზაქციების რეალურ დროში ჩახურვის საშუალებას გააჩენს, მათ შორის ტრანსნაციონალური გარიგებების შემთხვევაში.სტეიბლკოინების ბაზარზე ამ დრომდე არაერთ მოთამაშეს ვხვდებით, რომელთა შორის ყველაზე დიდი — USDT-ის ემიტენტი Tether-ია. USDT-ის საბაზრო კაპიტალიზაცია $155 მილიარდს აღემატება და ამ მაჩვენებლით ის კრიპტოვალუტებს შორის მესამე ადგილს იკავებს. უშუალოდ სტეიბლკოინების ბაზარზე USDT ჭეშმარიტი დომინანტია, რომელზედაც ბაზრის 61%-იანი წილი მოდის. მეორე ადგილს ამერიკული Circle-ის მიერ გამოშვებული USDC იკავებს, რომლის კაპიტალიზაცია $61 მილიარდია.

საფონდო ბირჟა ის ადგილია, რომელიც ადამიანებს რეალური სიმდიდრის შექმნის საშუალებას აძლევს, რაც მეტწილად იმითაა განპირობებული, რომ გრძელვადიან პერსპექტივაში, საფონდო ბირჟა მუდმივად იზრდება. ინდივიდუალური ინვესტორების გარდა, საფონდო ბირჟით ფულის გამომუშავებას კორპორაციები და თავად ის კომპანიები ახერხებენ, რომელთა აქციები ბირჟაზე ივაჭრება, რადგან აქციების გაყიდვა დამატებითი ფინანსური რესურსის მოზიდვის ერთ-ერთი ყველაზე ეფექტიანი და ნაკლებრისკიანი მეთოდია.საფონდო ბირჟაზე ვხვდებით, როგორც ე.წ. “პენი აქციების” მქონე კომპანიების, ანუ მცირე ზომის მოთამაშეებს, რომელთა ერთი აქციის შეძენა რამდენიმე ცენტად შეიძლება, ასევე დიდ კორპორაციებს, რომელთა საბაზრო კაპიტალიზაცია მილიარდებში და უკვე ტრილიონებში იზომება. პირველი კომპანია, რომელმაც $1-ტრილიონიან ნიშნულს მიაღწია ამერიკული Apple-ი იყო, რომელმაც მიღწევა $2 ტრილიონზე და $3 ტრილიონზე გაიმეორა. მოგვიანებით, ასპარეზზე NVIDIA გამოჩნდა, რომლის შეფასება $4 ტრილიონს აჭარბებს — ამ დრომდე, ის ერთადერთი კომპანიაა ამ სტატუსით.დღევანდელი მდგომარეობით, სულ მცირე $1-ტრილიონიანი შეფასება თერთმეტ კომპანიას აქვს, ესენია: NVIDIA, Microsoft, Apple, Amazon, Google, META, Saudi Aramco, Broadcom, TSMC, Tesla და Berkshire Hathaway. ჩამოთვლილებს შორის ერთი $4-ტრილიონიანია, ორი — $3-ტრილიონიანი და ორი — $2-ტრილიონიანი, დანარჩნების შეფასება კი $1 ტრილიონის ფარგლებშია. მსოფლიოს უდიდესი კომპანიებიდან თითქმის ყველა ამერიკულია, მაგრამ არსებობს ორი გამონაკლისი, ესენია მსოფლიოს უდიდესი ნავთობკომპანია Saudi Aramco და მიკროჩიპების და ნახევარგამტარების უდიდესი მწარმოებელი, ტაივანური TSMC.დროსთან ერთად, ტრილიონიანი კომპანიების ჩამონათვალში კიდევ ბევრი კომპანია გამოჩნდება, ხოლო დღეს არსებულებიდან, რომელიმე, შესაძლოა, გაკოტრდეს და სიიდან ამოვარდეს — ასეთი რამ ამ დრომდე არაერთხელ გვინახავს. ტრილიონიან კლუბში გაწევრიანების კანდიდატები, პირველ რიგში, ის კომპანიები არიან, რომელთა შეფასება ტრილიონთან ახლოსაა, ესენია: მსოფლიოს უდიდესი ბანკი, JPMorgan Chase-ი, მაღაზიების უდიდესი ქსელი Walmart-ი, გადახდების მსოფლიო გიგანტი VISA, უდიდესი ფარმაკოლოგიური კომპანია Eli Lilly და ტექნოლოგიური კომპანია Oracle-ი.გამორიცხული არაა, სიაში მოულოდნელად ახალი მოთამაშე გამოჩნდეს, როგორც ეს ბოლო წლებში NVIDIA-სთან მიმართებით მოხდა, რომლის საბაზრო კაპიტალიზაცია ბოლო ხუთ წელიწადში 1,500%-ზე მეტით გაიზარდა, ანუ 16-ჯერ გაიზარდა. ხელოვნური ინტელექტის ეპოქაში ასეთი ზრდა შეიძლება სხვა კომპანიებმაც დააფიქსირონ.

ამერიკული Amazon-ის დამფუძნებელმა, ჯეფ ბეზოსმა $5.7 მილიარდის აქციები გაყიდა. როგორც მარეგულირებლისთვის წარდგენილი უახლესი დოკუმენტიდან ვიგებთ, ანტრეპრენიორმა $954 მილიონის ღირებულების 4.2 მილიონი აქცია გაყიდა. აღნიშნული ტრანზაქცია იმ მრავალმილიარდიანი პაკეტის ფარგლებში შედგა, რომელიც ბეზოსმა აშშ-ის ფასიანი ქაღალდების და ბირჟების მარეგულირებელ კომისიასტან გასულ წელს შეათანხმა.ბეზოსის ტრანზაქციების პარალელურად, აპრილში დაფიქსირებული ლოკალური მინიმუმის შემდეგ, Amazon-ის შეფასება 38%-ითაა გაზრდილი, ანუ ბეზოსმა აქციები სარფიანად გაყიდა. თავად ბეზოსმა აქციების გაყიდვა ჯერ კიდევ 2002 წელს დაიწყო, რის შემდეგაც დაახლოებით $50 მილიარდის ფასიანი ქაღალდები აქვს გაყიდული.ამჟამად, ჯეფ ბეზოსი, მსოფლიოს მესამე უმდიდრესი ადამიანია, რომლის ქონებას ამერიკული Bloomberg-ი $252 მილიარდად აფასებს. ანტრეპრენიორის ქონების უდიდესი ნაწილი Amazon-ზე მოდის, რომელიც ამერიკელმა 1994 წელს დააფუძნა. თავიდან, Amazon-ი წიგნების მაღაზია იყო, მაგრამ დღეს ის მსოფლიოს უდიდესი ონლაინმაღაზიაა, სადაც ყველაფერი იყიდება.ამასთან, ჰოლდინგში ქლაუდ-სერვისების უდიდესი მიმწოდებელი, AWS-იც შედის, რომელიც ბოლო წლებში, კომპანიისთვის ელექტრონულ კომერციაზე არანაკლებად მნიშვნელოვანი გახდა. წლებია, რაც ჯეფ ბეზოსი Amazon-ის ყოველდღიურ მენეჯმენტში აღარ ერევა. Amazon-ის გენერალური დირექტორის პოსტი ბეზოსმა 2021 წელს დატოვა, მაგრამ სამეთვალყურეო საბჭოს თავმჯდომარე ისევ ისაა. ამასთან, ჯეფ ბეზოსი Amazon-ის უდიდეს აქციონერად რჩება, რომელზედაც კომპანიის დაახლოებით 8%-იანი წილი და საბჭოში ხმების 12% მოდის.მაშ, რატომ ყიდის ჯეფ ბეზოსი აქციებს, თუკი მისი ქონება $252 მილიარდია? საქმე ისაა, რომ მილიარდერების და მილიონერების ქონება, როგორც წესი, მეტად არალიკვიდურია, ანუ ის კომპანიის აქციების, უძრავი ქონების და სხვა მსგავსი აქტივების ღირებულებაზე არის დამოკიდებული. შესაბამისად, ქონების შეფასება არ ნიშნავს, რომ ადამიანი ამ ოდენობის ნაღდ ფულს ფლობს.თუკი მილიარდერს სურს, სახლი, კერძო თვითმფრინავი, იახტა ან ნებისმიერი სხვა რამ შეიძინოს, ის იძულებული ხდება აქტივები ნაღდ ფულში გადაცვალოს. ჯეფ ბეზოსი კი, როგორც ცნობილია, ფულს ხარჯავს არამხოლოდ ძვირად ღირებულ სათამაშოებზე, არამედ სხვა კომპანიებზე, მათ შორის კოსმოსურ ინდუსტრიაში არსებულ Blue Origin-ზე. ამასთან, მილიარდერის ბოლოდროინდელ ხარჯებში იტალიის ქალაქ ვენეციაში გამართული პომპეზური ქორწილი გამოჩნდა, რომელიც დაახლოებით $56 მილიონი დაჯდა.

ბოლო დღეების განმავლობაში ბიტკოინი $120,000-იან შუალედში ივაჭრება, რაც ნიშნავს, რომ მისი ჯამური საბაზრო კაპიტალიზაცია $2.35 ტრილიონია. ამ მაჩვენებლით, ბიტკოინი მსოფლიოს ერთ-ერთი ყველაზე ძვირად ღირებული ფინანსური ინსტრუმენტია, რომელსაც მხოლოდ ფიზიკური ოქრო და NVIDIA-ს, Microsoft-ის, Apple-ის, Amazon-ის და Google-ის აქციები უსწრებს.ბიტკოინი დეცენტრალიზებული ციფრული ვალუტაა, რომლის ფლობის უფლება და შესაძლებლობა ყველას აქვს, მაგრამ მისი უდიდესი ნაწილი რამდენიმე სუბიექტის საკუთრებაში არის კონცენტრირებული და ეს ტენდენცია ბოლო წლებში უფრო და უფრო თვალსაჩინო ხდება. ბიტკოინის უდიდეს მფლობელებს შორის ვხვდებით, როგორც კრიპტოვალუტის შემქმნელ სატოში ნაკამოტოს, ასევე რამდენიმე საერთაშორისო ფინანსურ კომპანიას.#1 — Satoshi Nakamotoრაოდენობა = 1.1 მილიონი ბიტკოინიღირებულება $120,000-ზე = $132 მლრდბაზრის წილი = 5.2%#2 — BlackRockრაოდენობა = 700,439 ბიტკოინიღირებულება $120,000-ზე = $84 მლრდბაზრის წილი = 3.3%#3 — Binanceრაოდენობა = 617,000 ბიტკოინიღირებულება $120,000-ზე = $74 მლრდბაზრის წილი = 2.9%#4 — Strategyრაოდენობა = 628,791 ბიტკოინიღირებულება $120,000-ზე = $75.4 მლრდბაზრის წილი = 2.9%#5 — აშშ-ის მთავრობარაოდენობა = 207,189 ბიტკოინიღირებულება $120,000-ზე = $24.8 მლრდბაზრის წილი = 1%

მსოფლიოს უდიდეს ნეობანკ Revolut-ს ამერიკის შეერთებულ შტატებში გაფართოება სურს. ბრიტანული Financial Times-ის ინფორმაციით, აშშ-ში საბანკო ლიცენზიის სწრაფად მისაღებად Revolut-ი მოქმედი ბანკის შეძენას განიხილავს. საბანკო ლიცენზიის დამოუკიდებლად მოპოვება ამერიკაში ურთულესია, რომელსაც, შესაძლოა, რამდენიმე წელი დასჭირდეს, ამიტომაც უკვე ლიცენზირებული ბანკის შეძენა ბრიტანულ ფინტექ-კომპანიას საქმეს ძალიან გაუმარტივებს. თან Revolut-ს გლობალური გაფართოების აგრესიული სტრატეგია აქვს, რისთვისაც ამერიკის შეერთებული შტატების ბაზარი საუკეთესოა.სრული საბანკო ლიცენზიის მიღებას Revolut-ი მშობლიურ ბრიტანეთშიც ცდილობს, მაგრამ ამ პროცესმა სამ წელზე მეტს გასტანა და საბოლოო ავტორიზაციამდე ჯერ კიდევ არ მიუღწევია. მართალია, კომპანია უკვე შევიდა ე.წ. “მობილიზაციის ფაზაში”, რაც ლიცენზიის მიღების შემდგომი ტექნიკური ეტაპია, მაგრამ ამ ფაზაზე ბანკს შეზღუდული ფუნქციონალი აქვს და მხოლოდ £50,000-მდე მოცულობის დეპოზიტების მიღება შეუძლია. მობილიზაციის ფაზა წესით 12 თვეზე მეტი არ უნდა გაგრძელდეს, მაგრამ, როგორც ჩანს, Revolut-ის შემთხვევა გამონაკლისია. კომპანია ბევრად მასშტაბურია, ვიდრე ნებისმიერი სხვა ნეობანკი, რაც რეგულირების პროცესს აჭიანურებს.მართალია, კონკრეტული ამერიკული ბანკის სახელი ჯერ არ გასაჯაროებულა, თუმცა Financial Times-ის ცნობით, Revolut-მა მიზანში შედარებით იაფი ბანკი ამოიღო, რომელსაც უკვე აქვს ეროვნული ლიცენზია. ეს გზა მნიშვნელოვნად დააჩქარებს პროცესს, განსაკუთრებით მაშინ, როცა აშშ-ის პრეზიდენტის დონალდ ტრამპის ადმინისტრაცია დერეგულაციის დღის წესრიგით მოქმედებს, ხოლო საბანკო ლიცენზიების გაცემის პროცესი უფრო მოქნილი გახდა.ცნობისთვის, Revolut-ის სერვისებს დღეს 60 მილიონი მომხმარებელი ჰყავს მთელ მსოფლიოში, ხოლო თავად კომპანია $1-მილიარდიანი საინვესტიციო რაუნდის გამართვას გეგმავს, რა დროსაც ბრიტანული სტარტაპის შეფასება $65 მილიარდამდე გაიზრდება. მოზიდული თანხის დიდი ნაწილი სწორედ საერთაშორისო გაფართოებას მოხმარდება. ცოტა ხნის წინ Revolut-მა არგენტინული ბანკი Cetelem-ი შეიძინა, რომელიც ამ დრომდე ფრანგული BNP Paribas-ის საკუთრება იყო. მედიის ინფორმაციით, ბრიტანული კომპანია მსგავსი გარიგების დადებას ახლო აღმოსავლეთშიც გეგმავს. Revolut-ს უკვე აქვს ლიცენზია მექსიკასა და ლიეტუვაშიც, რაც ევროკავშირში ოპერირების საშუალებას აძლევს.