საავტომობილო ინჟინერიის ერთ-ერთ მწვერვალად მიჩნეული ბრიტანული ავტმომწარმოებელი კომპანია Rolls-Royce-ი სპეციალური შეკვეთით შესრულებული ავტომობილების წარმოებას აფართოებს, რისთვისაც $370-მილიონიან ინვესტიციას გამოყოფს.ბრიტანული ავტომწარმოებელი ასწლოვან ტრადიციებს არ ღალატობს და ავტომობილებს დღესაც გაერთიანებულ სამეფოში, კუნძულის სამხრეთში მდებარე გუდვუდის ქარხანაში აწყობს. სათავო ოფისის გაფართოების შემდეგ, Rolls-Royce-ი Bespoke-ის და Coachbuild-ის მიმართულებებს განავითარებს, რაც კომპანიას უფრო მეტი ძალიან მდიდარი კლიენტის მომსახურების საშუალებას მისცემს.ბრიტანული Rolls-Royce-ი, რომელიც ავტომობილების გამყიდველმა ჩარლზ სტიუარტ როლსმა და ავტოინჟინერმა ფრედერიკ ჰენრი როისმა 1906 წელს, მანჩესტერში დააფუძნეს, დღეს, გერმანული BMW Group-ის შემადგენლობაში შედის. ბრიტანულმა ავტომწარმოებელმა, რომელიც ავტომობილებს ექსკლუზიურად ძალიან მდიდარი ადამიანებისთვის ქმნის, ბოლო წლებში, მნიშვნელოვანი ფინანსური სარგებელი მიიღო, რაც ფუფუნების საგნებზე მოთხოვნის მკვეთრ ზრდას უკავშირდება.გასულ წელს Rolls-Royce-მა 5,712 ავტომობილი გაყიდა, რაც 5%-ით, ანუ 320 ავტომობილით ნაკლებია, ვიდრე ერთი წლით ადრე, რასაც კომპანიის მენეჯმენტი ახალ მოდელებზე გადასვლას უკავშირებს. გასულ წელს, Rolls-Royce-მა არაერთი ახალი ავტომობილი წარმოადგინა, მათ შორის სრულად ელექტრო Spectre-ი, SUV-ის ტიპის განახლებული Cullinan-ი, რომელიც ლიმიტირებული რაოდენობით გამოდის. როგორც Rolls-Royce-ში ამბობენ, გაყიდული ავტომობილების ჯამური რაოდენობის კლების მიუხედავად, მკვეთრადაა გაზრდილი Bespoke-ის და Coachbuild-ის მიმართულების შემოსავალი, ანუ მომხმარებელი ექსლუზიურად მისთვის შექმნილ ავტომობილებს ითხოვს. ამ პროგრამებს შორის რამდენიმე დიდ განსხვავებას ვხვდებით.Rolls-Royce-ის Bespoke-ის პროგრამის ფარგლებში, მომხმარებელს შეუძლია Rolls-Royce-ის არსებული მოდელი აირჩიოს და ის უნიკალური ელემენტებით აღჭურვოს. მომხმარებელს, პირობითად, შეუძლია Rolls-Royce Phantom-ი შეიძინოს და საკუთარი ავტომობილისთვის შეარჩიოს, როგორც საღებავის ფერი, ასევე ინტერიერში გამოყენებული მასალები და დაიტანოს სასურველ ადგილზე მონოგრამები და ორნამენტები. Bespoke-ის პროგრამის მომხმარებელს შეუძლია კონკრეტული ფერის Phantom-ი შეუკვეთოს, რომლის ჭერი კონკრეტულ დღეს ცაზე არსებული ვარსკვლავებით იქნება მოჭედილი.თუ Bespoke-ის პროგრამის არსი არსებული ავტომობილის სრული პერსონალიზაციაა, Coachbuild-ის პროგრამის ფარგლებში მომხმარებელს სრულად უნიკალური ავტომობილის შექმნა შეუძლია, რაც Rolls-Royce-ის და ზოგადად საავტომობილო ინდუსტრიის არსენალში ყველაზე პრემიულ მომსახურებად მიიჩნევა. ადამიანი, რომელსაც Rolls-Royce-ის მენეჯმენტი Coachbuild-ის პროგრამაში მონაწილეობის ღირსად ჩათვლის, იღებს უფლებას შექმნას ავტომობილი, რომელიც მის კონკრეტულ ხედვას მიესადაგება. ეს ავტომობილი, შესაძლოა, Rolls-Royce-ის არსებულ მოდელს ჰგავდეს ან სრულად ახალი ავტომობილი იყოს, რომლის შექმნას მხარეები ერთობლივი ესკიზის დახატვით დაიწყებენ. ასეთი Rolls-Royce-ების ჩამონათვალში Sweptail-ი და Boat Tail-ი ხვდებიან, რომელთა შედარება უფრო ლოგიკურია არა ავტომობილებთან, არამედ — იახტებთან.აქვე, ორიოდ სიტყვა უნდა ვთქვათ თავად Rolls-Royce-ზე, რომელიც, მართალია, ავტომობილების წარმოებით არის ცნობილი, მაგრამ რეალურად გაცილებით ბევრ ბიზნესს არის მოდებული და ავიაციის, უსაფრთხოების და ენერგეტიკის სექტორებში ოპერირებს. კომპანია, რომელიც ამ მიმართულებით ვითარდება ლონდონის საფონდო ბირჟაზე არის დალისტული, სადაც Rolls-Royce-ის საბაზრო კაპიტალიზაცია $61.3 მილიარდს შეადგენს. 2022 წლის ოქტომბერში, აქციონერები კომპანიას $7 მილიარდად აფასებდნენ, რაც 775%-იანი ზრდაა. ეს ზრდა, Rolls-Royce-ის რამდენიმე მნიშვნელოვან პროდუქტს, მათ შორის თვითმფრინავების ძრავებს და ბირთვულ რეაქტორებს უკავშირდება, რომელთაც ბრიტანული კომპანია წამყვან მოთამაშეებს აწვდის.

დასავლეთ ევროპაში მდებარე ესპანეთი, რომელიც განსაკუთრებული პეიზაჟებით, ჰავით, ისტორიით და კულტურითაა დაჯილდოებული, წლების განმავლობაში უცხოელების ერთ-ერთ უსაყვარლეს დანიშნულებად იქცა. გასულ წელს, ესპანეთში 94 მილიონმა ტურისტმა იმოგზაურა, რამაც ქვეყანას 126 მილიარდი ევროს შემოსავალი მოუტანა. თუმცა დასვენების მოყვარულების გარდა, ესპანეთით უძრავი ქონების ინვესტორებიც ინტერესდებიან, რადგან, როგორც პრაქტიკა აჩვენებს, ეს სექტორი წლიურად საშუალოდ 8%-მდე ამონაგებს აბრუნებს, ხოლო კვადრატული მეტრის გასაყიდი და გასაქირავებელი ფასი წლიდან წლამდე იზრდება.როგორც ჩანს, უძრავი ქონების ბაზარზე არსებულ მდგომარეობას ესპანეთის მთავრობაში განსხვავებულად ხედავენ და ევროკავშირის მიღმა არსებული ქვეყნების მოქალაქეების მიერ ესპანეთში სახლების და ბინების შეძენას რისკად აფასებენ. როგორც ქვეყნის პრემიერ-მინისტრმა, პედრო სანჩესმა ცოტა ხნის წინ განაცხადა, ევროკავშირის არაწევრი სახელმწიფოების მოქალაქეებმა გასულ წელს ქვეყანაში 27,000 უძრავი ქონება შეიძინეს, რომელთა უმეტესობა განკუთვნილია არა საცხოვრებლად, არამედ გასაქირავებლად, რაც, მისი თქმით, ადგილობრივებს ცხოვრებას უძვირებს და დისკომფორტს უქმნის. პედრო სანჩესი ამბობს, რომ ამ პოლიტიკამ საზოგადოება ორ ნაწილად — მდიდარ მეიჯარეებად და ღარიბ მდგმურებად დაყო.აღნიშნული პრობლემის აღმოსაფხვრელად, ესპანეთის პრემიერ-მინისტრმა ევროკავშირის არაწევრი სახელმწიფოების მოქალაქეებისთვის შემზღუდველი ზომების შემოღებას გეგმავს. მთავრობის ინიციატივით შედგენილი საკანონმდებლო ბაზა ითვალისწინებს, როგორც ინვესტიციების მოზიდვისთვის განკუთვნილი ე.წ. “ოქროს ვიზების” პროგრამის გაუქმებას, ასევე უძრავი ქონების შეძენის შემთხვევაში დამატებითი 100%-მდე მოცულობის გადასახადის შემოღებას. თუკი ესპანეთის მთავრობამ 100%-იანი ტარიფი მართლაც დააწესა, ევროკავშირის არაწევრი ქვეყნების მოქალაქეებისთვის უძრავი ქონების ფასი, სულ მცირე, გაორმაგდება.კონკრეტულად რა საკანონმდებლო ინიციატივების შემოღებას გეგმავს პედრო სანჩესის გუნდი, ამ დროისთვის, უცნობია, მაგრამ როგორც პრემიერ-მინისტრი ამბობს, ესპანეთი კანადის და დანიის გადაწყვეტილებებით ხელმძღვანელობს. პარალელურად ამისა, ესპანეთის რამდენიმე ქალაქის ხელისუფლებამ უძრავი ქონების მოკლე ვადით გაქირავების აკრძალვის გადაწყვეტილება მიიღო, რაც რამდენიმე წლის შემდეგ ამოქმედდება და რეალურად, Airbnb-ის და მსგავსი პლატფორმების ოპერირებას კითხვის ნიშნის ქვეშ დააყენებს. თავად ამ გადაწყვეტილებამ კი, შესაძლოა, ბაზარზე კონკურენცია შეამციროს, რაც, სავარაუდოდ, ფასებს გაზრდის.

კალიფორნია კატასტროფულ ხანძრებს ებრძვის. ბოლო მონაცემებით, მასშტაბურ ხანძრებს სულ მცირე ოცდარვა ადამიანი ემსხვერპლა, ხოლო ცეცხლმა რამდენიმე ათეული ათასი შენობა შეიწირა, ორასი ათასამდე ადამიანს ევაკუაცია აიძულა და 9,500 ჰექტარი მიწა გადაწვა — ამ მაჩვენებლით, ეს ყველაზე დამანგრეველი ხანძარია ლოს-ანჯელესის ისტორიაში. უშუალოდ ცეცხლის ალის გარდა, პრობლემაა კვამლი, რომელიც სტიქიით დაზარალებულ რეგიონებში ყოფნას გაუსაძლისს ხდის. კალიფორნიისთვის ხანძრების პრობლემა არახალია, პირიქით — ამ ტიპის სტიქიას აშშ-ის უმდიდრესი შტატი ფაქტობრივად ყოველწლიურად ებრძვის. წლევანდელი სტიქიური უბედურების ზარალი, ამ დროისთვის, $250 მილიარდადაა შეფასებული.წელს მომძლავრებული ხანძრების ფონზე, ამერიკის შეერთებულ შტატებში სულ უფრო ხშირად დაიწყეს საუბარი სადაზღვევო კომპანიებზე და მათ მიერ ბოლო პერიოდში გატარებულ პოლიტიკაზე. სადაზღვევო კომპანიის დანიშნულება კლიენტებისთვის რისკის დაზღვევაა, ანუ როცა რისკი იზრდება, პრემია, ანუ თანხა, რომელსაც კლიენტი დაზღვევაში იხდის, ასევე იზრდება და ეს ტენდენცია ბოლო თვეებშიც დაფიქსირდა, როცა კომპანიებმა კალიფორნიასთან დაკავშირებული კლიენტებისთვის პრემია სულ მცირე 20%-ით გაზარდეს, მაგრამ ზოგიერთ შემთხვევაში, თანხა გაორმაგდა და გასამმაგდა კიდეც. დღეს არსებული მონაცემებით, სადაზღვევო კომპანიებმა კლიენტებს $28 მილიარდის ზარალი აუნაზღაურეს.

არაბთა გაერთიანებული საამიროების უმდიდრესი საამიროს, დუბაის ხელისუფლებამ არარეზიდენტი ინვესტორებისთვის უძრავი ქონების გასხვისების პროცედურებს ართულებს.ახალი კანონის თანახმად, მინდობილობის მიცემის პრაქტიკა აიკრძალება, ანუ უძრავი ქონების გაყიდვის პროცესს ბინის, სახლის თუ კომერციული ფართის მფლობელი თავად უნდა დაესწროს. ამ გზით, ქვეყნის ხელისუფლება უძრავი ქონების სექტორში მეტი გამჭვირვალობის შეტანას გეგმავს.ახალი კანონმდებლობა ძალაში მიმდინარე კვირას შევა. მას შემდეგ, უძრავი ქონების გამყიდველი ვალდებული იქნება არაბთა გაერთიანებულ საამიროებში რეგისტრირებულ ბანკში ანგარიშის ნომერი გახსნას, რადგან წინააღმდეგ შემთხვევაში ტრანზაქციიდან მიღებულ შემოსავალს ვერ გამოიყენებს. როგორც სახელმწიფო უწყებებში განმარტავენ, მინდობილი პირის ინსტიტუტი კვლავაც იარსებებს, მაგრამ თავად თანხა ბინის მესაკუთრის ანგარიშზე უნდა ჩაირიცხოს.

ლეგენდარული გერმანული ავტომწარმოებელი, გერმანული Porsche, რომელიც ავტომობილების, იახტების და ველოსიპედების საწარმოო ხაზის გარდა დიზაინის სტუდიასაც ფლობს, უძრავი ქონების ბიზნესში ფართოვდება. საცხოვრებელი უძრავი ქონების ბაზრისთვის გერმანულმა კომპანიამ, ამჯერად, ტაილანდის დედაქალაქის, ბანკოკის ბაზარი აირჩია, სადაც ტაილანდურ დეველოპერულ კომპანიასთან, Ananda Development-თან თანამშრომლობით 21-სართულიან საცხოვრებელ კორპუსს აშენებს. კომპლექსი პრემიული იქნება — აპარტამენტების ფართობი 525-დან 1,135 კვადრატულ მეტრამდე, ფასები კი $15 მილიონიდან $40 მილიონამდე მერყეობს. პროექტი 2028 წელს დასრულდება, ხოლო აპარტამენტების უდიდესი ნაწილი უკვე გაყიდულია.ბანკოკი, სადაც დაახლოებით თერთმეტი მილიონი ადამიანი ცხოვრობს, ბოლო პერიოდში, უძრავი ქონების დეველოპერებისთვის ერთ-ერთი ყველაზე მიმზიდველ დანიშნულებად იქცა აზიურ ქალაქებს შორის, რაც იქ არსებულ შედარებით იაფ ფასებს უკავშირდება. გერმანული Porsche-ს გარდა, ბოლო წლებში ბანკოკში პრემიული სეგმენტის საცხოვრებელი კომპლექსები The St. Regis-მა, Ritz-Carlton-მა, Four Seasons-მა, Banyan Tree-მ და Mandarin Oriental-მა ააშენეს, რაც გლობალური კომპანიების მხრიდან მზარდ ინტერესზე მიუთითებს. გასულ წელს, პრემიული აპარტამენტების გაყიდვებმა ბანკოკში 25%-ით იმატა, ხოლო ბაზრის ზომამ $2.2 მილიარდი შეადგინა. მყიდველებს შორის, უმეტესწილად, რუსებს და ჩინელებს ვხვდებით.ცნობისთვის გეტყვით, რომ ბანკოკის Porsche Design Tower-ი ამ ტიპის პირველი პროექტია, რომელიც გერმანულმა კომპანიამ აზიაში ახორციელებს. თუმცა უძრავი ქონების ბაზარი Porsche-სთვის ახალი სულაც არ არის, პირიქით — ამ მიმართულებით გერმანულ კომპანიას არაერთი პროექტი განუხორციელებია, როგორც ფლორიდის დედაქალაქ მაიამიში, ასევე მშობლიურ შტუტგარტში. Porsche Design-ის უძრავი ქონება გამოირჩევა მისი ფუნქციური დიზაინით, ტექნიკური ინოვაციით და გემოვნებით, რაც, პრინციპში, ის თვისებებია, რომელთა გამო ავტოენთუზიასტები Porsche-ს ავტომობილებს ყიდულობენ.Porsche Design-ის გამორჩეულ პროექტებს შორის აუცილებლად უნდა ვახსენოთ მაიამიში მდებარე 60-სართულიანი ცათამბჯენი, რომელიც გერმანულმა კომპანიამ 2017 წელს ააშენა, Dezer Development-თან პარტნიორობით. ცილინდრის ფორმის ამ შუშის ცათამბჯენში 132 აპარტამენტს ვხვდებით და თითოეული მათგანი აღჭურვილია კერძო ავტოფარეხით, სადაც მცხოვრები სპეციალური ლიფტის საშუალებით ხვდება. ეს ლიფტი თითოეულ ბინას უკავშირდება და თან, ერთგვარ საგამოფენო სივრცეს წარმოადგენს, სადაც კომპლექსში მცხოვრებს მისი ძვირად ღირებული ავტომობილის ჩვენება შეუძლია. ეს ფუნქციონალი, სხვათა შორის, Porsche Design Tower Bankok-შიც არის შენარჩუნებული, რადგან ეს გერმანული კომპანიის და ამ ტიპის უძრავი ქონების მთავარი ნოუჰაუა.საინტერესოა, რომ Porsche-სთან ერთად, ძვირად ღირებული უძრავი ქონების ბაზარზე სხვა პრემიულ ავტომწარმოებელ კომპანიებსაც ვხვდებით, რომლებიც, ამ გზით, შემოსავლის დივერსიფიკაციას და მომხმარებლებისთვის ახალი გამოცდილების შეთავაზებას ახერხებენ. გამორჩეულ პროექტებს შორის აუცილებლად უნდა ვახსენოთ Aston Martin-ის და Bentley-ის მაიამის რეზიდენციები და დუბაიში და აბუ-დაბიში მდებარე არაერთი ულტრა ძვირად ღირებული პროექტი, რომელთა განმახორციელებლებს შორის Bugatti, Maserati, Lamborghini, Ferrari და Pagani არიან. შეგვიძლია ვივარაუდოთ, რომ დროსთან ერთად, ეს ტენდენცია კიდევ უფრო გაღრმავდება.

ენცო ფერარის მიერ იტალიის ქალაქ მარანელოში დაფუძნებული Ferrari ერთ-ერთი ყველაზე გავლენიანი კომპანიაა, რომელიც ავტოინდუსტრიას ოდესმე უნახავს. ყალყზე შემდგარი ულაყი Ferrari-ის ყველასთვის კარგად ნაცნობი სიმბოლოა, რომელიც სპორტულ დომინაციასთან, პრესტიჟთან და ადამიანური წარმატების მწვერვალთან ასოცირდება.Ferrari-ით შთაგონებული ხელოვნების ნიმუშების ჩამონათვალში კიდევ ერთი პუნქტი გაჩნდა — ფლორიდის ქალაქ დელრეი-ბიჩში მდებარე “კასა მარანელო”. ყალყზე შემდგარი ულაყის ამბიციით შთაგონებული ეს სასახლე, ცოტა ხნის წინ, რეკორდულ $50.5 მილიონად გაიყიდა.იტალიური სარბოლო ფილოსოფიით შთაგონებული ამ სასახლის ფართობი 1,900 კვადრატული მეტრია, სადაც საცხოვრებელ ტერიტორიასთან ერთად განთავსებულია, როგორც Ferrari-ის ულაყის ბრინჯაოს ქანდაკება და შადრევანი, ასევე 12 ავტომობილზე გათვლილი და კაკლის ხით მოპირკეთებული ავტოფარეხი, რომელიც დიზაინით არცერთ პრესტიჟულ სასტუმროს არ ჩამოუვარდება. “კასა მარანელოს” ტერიტორიაზე ასევე ვხვდებით 315 მ²-ის ფართობის საძინებელს, რომელიც 120 მ²-იან გარდერობს და 75 მ²-ის ფართობის აბაზანას უკავშირდება. სასახლეში ასევე არის სტუმრებისთვის განკუთვნილი ოთხი საძინებელი, 14 სტუმარზე გათვლილი კინოთეატრი და რამდენიმე მოსასვენებელი სივრცე.სასახლის მფლობელის 315 მ²-იანი საძინებლიდან მარტივად გადახვალთ სილამაზის სალონში და მასაჟის კაბინეტში, რომლებიც ასევე სასახლეში მდებარეობს. ალბათ მარტივი მისახვედრია, რომ სასახლეში, სადაც პირად სილამაზის სალონს ვხვდებით, ველნესი და სპა განსაკუთრებით უყვართ. აი, სწორედ ამაზე მიგვანიშნებს იტალიური Bulgari-ის დიზაინის ენით შთაგონებული ველნესის სივრცე, სადაც განთავსებულია, როგორც შიდა აუზი, ასევე ჰიმალაის მარილის ოთახი, საუნა და ფინური აბანო. “კასა მარანელოში”, რასაკვირველია, გარე აუზსაც ვხვდებით, რომლის სიგრძე 90 მეტრია, ტევადობა კი — 340,000 ლიტრი. იქვე ვხვდებით წყლის შეზლონგებს და კიდევ ერთ სპას.შთამბეჭდავია Ferrari-ით შთაგონებული სასახლის სამზარეულოც, რომელიც საუკეთესო ხარისხის ბუნებრივ იტალიურ მარმარილოში არის გადაწყვეტილი. სამზარეულოდან შეფმზარეულის პირად სამზარეულოში გადახვალთ, ხოლო იქვე 9-მეტრიანი ბარით აღჭურვილ მოსასვენებელ ლაუნჯსაც შეხვდებით, სადაც ყველა იმ ალკოჰოლურ სასმელს შეხვდებით, რომელიც, შესაძლოა, მოგინდეთ. ლაუნჯი 20 ადამიანზე არის გათვლილი, ხოლო სასადილოში, რომლის ცენტრში პატაგონიურ-ბრაზილიური ონიქსისგან დამზადებულ მაგიდას შევხვდებით, ერთდროულად, 18 სტუმარი ეტევა.სასახლე მასშტაბით და უნიკალურობით იმდენად შთამბეჭდავია, რომ გარიგება, რომელიც მის გასაყიდად დაიდო, ცალკე აღნიშვნის ღირსია. სრულად გამოწყობილ სასახლეში ახალმა მფლობელმა $24.5 მილიონი გადაიხადა და ფულს სამეზობლოში მდებარე 1,670 მ²-ის ფართობის სასახლე დაამატა, რომელიც, სხვათა შორის, ჯეიმს ბონდით და მისი საყვარელი საავტომობილო ბრენდით, Aston Martin-ითაა შთაგონებული. სანაცვლოდ, სახლთან ერთად, მყიდველმა მინიატიურული წითელი Ferrari 250 Testa Rossa მიიღო, რომელიც 80 კმ/სთ-ში სიჩქარემდე ჩქარდება. თავად ეს ელექტრომობილი $100,000 ღირს და ის საკმაოდ იშვიათ საქონელს წარმოადგენს.